My Sample Anger

ဘယ်နားက စပြောရမှန်း မသိတဲ့ ကျွန်မရဲ ဒေါသလို့ စပြောရမယ်မှန်းကို တကယ်မသိခဲ့ဘူး။ ဒေါသဆိုတာ မကောင်း ဘူးလို့ လူတွေပြောကြပေမယ့်။ ကျွန်မကဘဲ ဒေါသထွက်လွယ်တာဘဲလား။ ကျွန်မဆီကိုဘဲ ဒေါသထွက် ရမယ့်အရာတွေ လာခဲ့တာလားဆိုတာ လုံးဝမသိတော့ဘူး။

ပြသနာအစကတော့ ရှင်းရှင်းလေးပါ။ ကျွန်မမောင်လေးက ကွန်ပျူတာလိုချင်တယ်ဆိုလို့ စလုံးမှာလည်း ဈေးတွေ ချနေတာနဲ့ ကွန်ပျူတာဝယ်ဖို့ ဖြစ်လာပါတယ်။ တစ်ခန်းတည်းမှာနေတဲ့ အစ်မတစ်ယောက်က မြန်မာပြည်ပြန်မယ် ဆိုတော့ သူနဲ့ ထည့်ပေးမယ်လို့ ပြောလိုက်မိပါတယ်။ သူက သယ်ပေးမယ်လို့ ပြောပါတယ်။ ဒါဆို အဆင်ပြေပြီဆိုပြီး သူပြန်မယ့် ရက်ကိုချိန်ပြီး ကွန်ပျူတာဝယ်လိုက်ပါတယ်။ သယ်ပေးမယ်ဆိုတော့ ကျွန်မအမှန်အတိုင်းပြောရရင် အချင်းချင်းဆိုတော့ အလကားမတ်တင်းသယ်ပေးမယ်လို့ ထင်မိပါတယ်။ ကျေးဇူးတင်မိပါတယ်။ တစ်ခုခု ပြန်လုပ်ပေးမယ်လို့ လည်း စိတ်ထဲ မှတ်ထားပါတယ်။ ဒါမျိုးဆို ပိုက်ဆံပေးရတယ် လို့လည်း ကျွန်မသိထားပါတယ်။

ဒီလိုနဲ့ ကွန်ပျူတာဝယ်ပြီးသွားပါတယ်။ နောက် အဲ့ဒီအစ်မ ပြန်မယ့်နေ့မတိုင်ခင်တစ်ရက်ကျတော့ ကျွန်မလည်း ထည့်ပေးမယ့် ပစ္စည်းတွေကို စစ်၊ အဆင်ပြေအောင် ဘယ်လို လုပ်ရမလဲ စီစဉ်။ ဟိုတစ်ယောက်မှာတဲ့ ဟာတွေ ကွန်ပျူတာထဲ ထည့်ပေါ့။ တစ်ယောက်တည်း အလုပ်ရှုပ်နေပါတယ်။ အဲ့ဒီညနေမှာ ပစ္စည်းယူမယ့် အစ်မက ပြောပါတယ်။ ကွန်ပျူတာ ထည့်ပေးချင်ရင် ပိုက်ဆံပေးရမယ်လို့ အဲ့ဒါနဲ့ သြော် ဟုတ်ကဲ့ ဒါဆို အားနားစရာ၊ ကျေးဇူးတင်စရာမလိုတော့ဘူးပေါ့လို့ စိတ်ထဲမယ် ပြောမိပါတယ်။ ပြီးတော့ ပစ္စည်းရဲ့ ၁၀ ရာခိုင်နှုန်း ပေးရမယ်လို့ ပြောပါတယ်။ ကျွန်မ ပစ္စည်းက ၁၆၀၀ တန်ပါတယ်။ ၁၀ ရာနှုန်းဆို ၁၆၀ ပေးရမယ်ပေါ့။ ဒါဆို ကွန်ပျူတာ တန်ဖိုး ၁၈၀၀ လောက်ဖြစ်သွားပြီပေါ့။

ဈေးစကားပြောလာပြီဆိုတော့ ကျွန်မနေနဲ့ ဒီတိုင်း ထိုင်နေလို့ မရတော့ စုံစမ်းရတာပေါ့။ ပေါက်ဈေးဘယ်လောက် ရှိလဲပေါ့။ ၁၆၀ ဆိုတဲ့ ငွေက တော်တော်များပါတယ်။ ကျွန်မအနေနဲ့ကတော့ များတယ်လို့ မြင်မိပါတယ်။ ဒီလောက်ငွေယူပြီး လုပ်ရင် အာမခံချက် ဘယ်လောက်ရှိလဲ ဆိုတာလဲ ကျွန်မခေါင်းထဲ ရောက်လာပါတယ်။ အစက ခင်မင်မှုကနေ အလုပ်လိုပုံစံမျိုးဖြစ်လာပြီဆိုတော့ အလုပ်လို စဉ်းစား မိလာပါတယ်။ ဒါက ကျွန်မဘက်က စဉ်းစားမိတာကို ရေးတာပါ။ သူငယ်ချင်းတွေ မေး၊ ပင်နီစူးလားက ဆိုင်တွေကို ဖုန်းဆက်မေးပါတယ်။

သူငယ်ချင်တွေကတော့ ပုံမှန်ဆို ကိုယ်က သယ်ချင်ရင် ဆိုင်ကနေ ရတာကတော့ ၄၀ လောက်ရတယ်။ အချင်းချင်းဆို ခင်မင်မှုပေါ်မူတည်ပြီး ဈေး အတိုးအလျှော့ရှိပါတယ်တဲ့။ ပြီးတော့ စလုံးမှာ နာမည်ကြီး ဈေးအကြီးဆုံး ဆိုင်ဖြစ်တဲ့ ဒေါ်သန်းသန်းနု ဆိုင်ကို ဖုန်း ဆက်မေးကြည့်ပါတယ်။ လက်တော့ တစ်လုံးကို ပို့ဆောင်ခ ၁၂၀ ပေးရပါ့မယ်။ သူတို့ ဘက်က ပစ္စည်းတန်ဖိုးအပေါ်မှာ ကြည့်ပြီး ၁၀၀၀ အာမခံပါတယ်တဲ့။ အပြောက်အရှပေါ်မှာ မူတည်ပြီး အာမခံကြေးပါတဲ့။ နောက် တခြားဆိုင်တွေ မေးတော့ ကိုယ်က ပေးချင်ရင်ဆိုင်တွေက ပို့ဆောင်ခအနေနဲ့ ၇၀ တောင်းပါတယ်။ ဒီတော့ စလုံးကနေ မြန်မာပြည် ပို့ဆောင်ခ ဈေးကွတ်တော့ သိသွားတာပေါ့နော်။

ဒါပေမယ့် ဆိုင်တွေကနေ တကယ်သယ်မယ့်လူကို ပြန်ပေးတဲ့ ဈေးကတော့ ကျွန်မတို့ဆီက တောင်းတဲ့ဈေးဖြစ်မှာ မဟုတ်တာတော့ သေချာပါတယ်။ အနဲဆုံး ၂၀ ခွဲမယ် အများဆုံး ၃၀ ခွာမှာပါဘဲ။ ဒီတော့ အိမ်မှာ ပြန်ပြီး ဈေးဆစ်ရပါတယ်။ မဆစ်လို့လည်း မရဘူးလေ။ အဲ့ဒီအစ်မက အခုမှစလုံးကို ပထမဆုံး ရောက်ဖူးတဲ့သူ။ စလုံးဈေးကွတ်လည်း သေချာမသိတဲ့လူလို့ ထင်ပါတယ်။ ဒါနဲ့ အပြင်မှာတော့ ဈေးတွေ ဘယ်လောက်ရှိတယ်၊ ဘယ်လောက်ပေါက်တယ် အစ်မ တောင်းတဲ့ဈေးတော့ ဈေးကွတ်မှာ မရှိဘူးလို့ ပြောမိပါတယ်။ ကျွန်မစိတ်ထဲမယ်လဲ ဒီလောက်ဈေးတွေ အများကြီး တောင်းရင် အာမခံချက် ဘယ်လောက်ရှိလဲ ဆိုတာမျိုးဖြစ်လာပါတယ်။ ဟိုဆိုင်တွေကတော့ အာမခံချက် ရှိတာကိုလည်း သိလိုက်ရတာကြောင့်လည်း ပါမှာပါ။

ကျွန်မမှာ မကောင်းတဲ့အကျင့်ကတော့ ပြောပြီးသားစကားကို ပြန်ပြီး ဖျတ်ဖို့ အရမ်း တွန့်ဆုတ်တက်တဲ့ အကျင့်ပါဘဲ။ အဲ့ဒီအကျင့်ကြောင့်လည်း ပြသနာ တော်တော်များများနဲ့ ရင်ဆိုင်ပြီးပေမယ့် အခုထိ နိုးလို့ ပြောရမှာ တော်တော်ဘဲ တွန့်ဆုတ်တဲ့ ရောဂါရှိလေတော့။ သူမများရမယ့် ပိုက်ဆံ ကိုယ်နဲ့ သိတဲ့လူရပါစေ၊ ကိုယ်လည်း ပြောပြီးသားစကား ပြင်စရာမလိုတော့ဘူးဆိုတော့ ဈေးညှိကြည့်လိုက်တယ်။ သူက နဲနဲတော့ အင်တင်တင် ဖြစ်နေတယ်။ ကိုယ့်ကို သိပ်ပြီး ချမ်းသာတယ်လို့ အရမ်းအထင်ကြီးတာလဲ ပါမှာပေါ့။ (ဒါက ကိုယ့်ဘာသာထင်တာ)။ ဒီလိုနဲ့ ဈေးက ၆၀ နဲ့ တည့်သွားတယ်။ ပြီးတော့ ကိုယ်က လောဘတက်ပြီး ဂျီအက်စ်တီ ရီဖန်းပြန်လိုချင်တော့ လေဆိပ်လိုက် သွားလိုက်တယ်။ အထဲ ရောက်မှထုတ်လို့ ရမယ်လို့ သူငယ်ချင်းကပြောတော့လည်း ပြောသား။ ရမလားစမ်းတာ မရဘူးဖြစ်သွားတယ်။ ဒါနဲ့ပဲ စက်ကြီး မြန်မာပြည် ရောက်သွားတယ်ပေါ့။

ချစ်စွာသော မောင်လေးက စက်ရပြီးသကာလမှာ ဘာမှအကြောင်းမပြန်ဘာမှမပြောပေမယ့် ကိုယ့်က အဆင်ပြေလား လှမ်းမေးတော့ အဆင်ပြေတယ်ဆိုတော့ ၀မ်းသာမိပါတယ်။ ဒါပေမယ့် ၁ လနီးပါလောက်ကြာမှာ installation CD တွေ ဘယ်မှာလည်း လှမ်းမေးတယ်။ အဲ့ဒီတော့မှ သူ CD တွေ မရဘူးဆိုတာ သိတယ်။ ကိုယ်က လေဆိပ်မသွားခင် ထည့်ပေးလိုက်ပြီးနောလို့ ပြောပြီး ရှေ့တင်ထည့်လိုက်တာ။ ယူသွားတဲ့လူက သူ ဘာမှဖွင့်ပြီး မကြည့်ဘူး ဒီအတိုင်ပေးလိုက်တာတဲ့။ ပစ္စည်းလာယူတဲ့လူကလည်း ဘာမှမစစ်ကြည့်ဘဲ ဒီအတိုင်းယူသွားတယ်။ ထည့်ပေးလိုက်တဲ့ ကျွန်မ အဲ့ဒီတော့မှ ခေါင်းကိုက်ရတယ်။ နောက်ဆုံးကျတော့ အလုပ်လုပ်တဲ့ ကျွန်မက ပစ္စည်း ပေးတုန်းက စာရင်းလုပ်ပြီး မပေးမိ၊ ပြီးတော့ ပက်ကင်ထုတ်ပြီး မပေးမိတာကြောင့်။ ကွန်ဖန်းလုပ်ဖို့ လုပ်ဖို့ လိုသွားတာကြောင့် ပြဿနာအားလုံးရဲ့ အဓိက တရားခံက ကျွန်မလုံးလုံးဖြစ်သွားပါတယ်။

ဒီကိစ္စမှာ စာရင်းမလုပ်မိတဲ့ကျွန်မရယ်၊ လက်ခံတုန်းက မစစ်ဘဲယူသွားတဲ့ ချစ်စရာမောင်လေးရယ်၊ ပစ္စည်းကို စစ်ပြီးမှယူပါလို့ ကွန်ဖန်းမလုပ်မိတဲ့ သူရယ် သုံးယောက်ကြောင့် installation CD တွေ အစရှာမရအောင် ဖြစ်သွားပါတယ်။ ကျွန်မက ထည့်ပေးလိုက်တာ သေချာတယ်လို့ ကိုယ့်ကိုယ်ကို ယုံတယ်။ သယ်ပေးတဲ့လူက သူ့ဆီမှာ မကျန်ခဲ့ဘူးလို့ ပြောတယ်။ လက်ခံရရှိသူက သူ လက်ခံတဲ့အထဲမှာ အဲ့ဒီ ပစ္စည်းမပါပါဘူးလို့ ပြောတယ်။ ကဲပါ ကျွန်မရဲ့ ရိုးရိုးဒေါသကို ဘယ်နား သွားထွက်ရမလဲ ပြောကြပါဦး။ နောက်ဆုံးတော့ ဇာတ်လမ်းစစချင်းမှာ ပါတဲ့ ကျွန်မက ပြဿနာကောင်ကြီး ဖြစ်သွားတော့ ငါသည်သာ ဒေါသထွက်စရာကြီး ဖြစ်သွားပါတယ်။ ကြာကြာနေရင် ဒီဒေါသနဲ့တင် ဦးနှောက်သွေးကြောပြတ်ပြီးသေပါလိမ့်မယ်။